Hitzfeld framlengir við Bayern

Þjálfarinn Ottmar Hitzfeld hefur skrifað undir nýjan samning við Þýskalandsmeistara Bayern Munchen og gildir hann út næstu leiktíð. Hitzfeld samdi fyrir nokkru við félagið út þessa leiktíð eftir að Felix Magath var rekinn, en aldrei stóð til hjá honum að vera lengur hjá félaginu en til vors.

"Ottmar Hitzfeld hefur algjörlega unnið okkur á sitt band á síðustu vikum með því góða starfi sem hann hefur unnið hjá félaginu og það að hann skuli vera búinn að binda sig áfram gerir okkur kleift að gera áætlanir fyrir næsta tímabil. Við tókum þá ákvörðun að framlengja aðeins um eitt ár að þessu sinni, en svo munum við sjá hvernig gengur og taka ákvörðun um framhaldið þegar að því kemur," sagði Uli Hoeness, framkvæmdastjóri félagsins.

Hitzfeld er 58 ára gamall og er að stýra Bayern í annað sinn á ferlinum. Hann náði frábærum árangri með liðið á sínum tíma en var alfarið búinn að snúa sér að vinnu fyrir sjónvarp þegar gamla félagið hans kallaði á hann um daginn.