Danir styðja lögregluna

Yfirgnæfandi meirihluti dönsku þjóðarinnar er ánægður með framgöngu lögreglunnar í Ungdómshúss- málinu, samkvæmt skoðanakönnun sem gerð var fyrir dönsku sjónvarpsstöðina TV-2. Samkvæmt könnuninni þykir 92 prósentum Dana að lögreglan hafi unnið sitt starf mjög vel eða vel, í óeirðunum síðustu daga.

Þetta er óvenju afgerandi niðurstaða í skoðanakönnun, að sögn Nyhedsavisen í Danmörku. Aðeins 2 prósent töldu að lögreglan hefði staðið sig illa og enginn var þeirrar skoðunar að hún hefði staðið sig mjög illa.

Danir eru þekktir fyrir umburðarlyndi við mótmælendur en í skoðanaskiptum og forystugreinum danskra fjölmiðla má lesa að aðstandendur Ungdómshússins þyki hafa gengið alltof langt. Mótmælendur ollu tugmilljóna tjóni með skemmdarverkum, með því til dæmis að kveikja í bílum og gera götuvígi úr logandi reiðhjólum og ruslatunnum.

Eigendurnir verða að bera þetta tjón sjálfir, og meðal annars hefur verið upplýst að íbúar á Nörrebro verða að greiða samtals tíu milljónir króna fyrir það eitt að endurnýja ruslatunnur sínar.