Charlton hafnaði tilboði West Ham í Hermann

Sky Sports fréttastofan í Englandi sagði frá því í dag að Charlton hefði hafnað rúmlega 300 milljóna tilboði West Ham í íslenska varnarmanninn Hermann Hreiðarsson. Eggert Magnússon og Alan Curbishley þekkja vel til Hermanns og hæfileika hans - Curbishley frá stjóratíð sinni hjá Charlton og Eggert frá starfi sínu hjá KSÍ.

West Ham hefur verið í mikilli leit að varnarmönnum til að styrkja sitt lið í janúar og segir Sky Sports að félagið hafi leitað til Hermanns eftir að Birmingham hafi í tvígang hafnað tilboði í Matthew Upson.