Tennisspilarinn Ivan Ljubicic datt óvænt úr keppni í fyrstu umferð Opna ástralska meistaramótsins í tennis í morgun þegar hann beið í lægri hlut gegn Bandaríkjamanninum Mardy Fish í fjórum settum. Ljubicic var í fjórða sæti á styrkleikalista mótsins. Roger Federer hóf titilvörn sína með auðveldum sigri.
Hinn króatíski Ljubicic átti í raun aldrei möguleika gegn frískum Hardy, en hann er í 42. sæti á heimslistanum og hefur verið á mikilli uppleið síðustu mánuði eftir að hafa verið í 341. sæti um tíma á síðasta ári.
Hinn svissneski Federer sigraði Bjorn Phau í þremur settum, 7-5, 6-0 og 6-4, og þótti nokkuð ryðgaður í fyrstu lotunni en sýndi sitt rétta andlit í þeirri annari. Rafael Nadal frá Spáni, sá sem flestir telja að komi til með að veita Federer hvað mesta keppni, hefur leik á mótinu í nótt.
