Vill semja fyrir Beyoncé

„Ég fékk styrk frá Menningarsjóði Glitnis og er með tvö lög í farvatninu," segir Jón Jósep Snæbjörnsson, betur þekktur sem Jónsi. Nýlega stóð Icefusion.com og Hótel Glymur fyrir merkilegum vinnudögum í Hvalfirðinum þar sem margir af fremstu lagasmiðum þjóðarinnar hittu fyrir virta erlenda starfsbræður sína.

Jónsi hefur hingað til aðallega verið þekktur fyrir söng með Svörtum fötum en hann ætlar að reyna að koma lagasmíðum sínum á framfæri erlendis. Hann var nokkuð tregur til að gefa upp hverjir væru efstir á óskalistanum. „En ég samdi þessi lög með Westlife og Beyoncé Knowles í huga," sagði Jónsi sem fannst mikið til þessarar ráðstefnu koma. „Ég vann mikið með náunga sem heitir Chris Tomaidis og útiloka síður en svo eitthvert frekara samstarf við hann."

Meðal annarra erlendra lagasmiða sem komu hingað til lands voru "80-hetjan Nick Kershaw og Chesney Hawks auk hins færeyska Teits sem notið hefur töluverðrar hylli hér á landi. Samkvæmt heimildum Fréttablaðsins náðu hinir íslensku og erlendu lagahöfundar vel saman í kyrrðinni í Hvalfirði og er allt útlit fyrir að íslenskar lagasmíðar eigi eftir að sækja í sig veðrið á erlendri grundu.

Meðal annarra sem tóku þátt í vinnudögunum var Guðmundur Jónsson, gítarleikari Sálarinnar, en mörgum þykir það eflaust tíðindum sæta að hann skuli sækja svona námskeið enda verið einn fremsti lagahöfundur landsins um árabil. Og er þekktur fyrir að vilja semja einn síns liðs. „Þetta var svona eins og hraðstefnumót, maður sat í tíu tíma yfirheyrslu og þetta var álíka erfitt og þetta var skemmtilegt," segir Guðmundur en bætir við að þetta hafi fyrst og fremst verið hálfgerð tilraun af hans hendi. „Svona fyrirkomulag er mjög algengt í Bretlandi og ég kynntist þessu aðeins þegar ég bjó þar. Ég reikna nú ekkert frekar með því að það verði framhald á svona samstarfi en það komu vissulega tvö eða þrjú frambærileg lög út úr þessu," segir Guðmundur.

Mikil vinátta tókst með þeim Vigni Snæ Vigfússyni, Sverri Bergmann og Chesney Hawks og Nick Kershaw. Vignir Snær upplýsti í samtali við Fréttablaðið að allar líkur væru á því að hann og Sverrir myndu jafnvel halda utan á næstunni til fundar við Chesney og jafnvel Kershaw. „Þetta er allt í bígerð þótt endanlegar tímasetningar séu ekki komnar á hreint."