Fyrsta áfangi tilbúinn í árslok

Tuttugu ný störf verða til í Sandgerði eftir að fyrsti áfangi grænnar gagnageymslu verður tekinn í notkun. Fyrirtækið Data Íslandia stendur fyrir byggingu gagnageymslunnar sem fyrirhugað er að reisa á fyrrum varnarsvæði Sandgerðisbæjar.

Gert er ráð fyrir umtalsverðri fjölgun starfa þegar starfsemin verður komin á fullt skrið. Sol Squire, framkvæmdastjóri Data Íslandia, segir áætlað að um það bil helmingur starfsmanna verði sérfræði- eða tæknimenntaður. „Stefna fyrir­tækisins er að ráða Íslendinga í þau störf sem skapast. Einnig höfum við verið í viðræðum við Háskólann í Reykjavík um mögulegt samstarf í formi starfsþjálfunar,“ segir Sol, sem kynnti fyrirhugaða uppbyggingu og starfsemi Data Islandia á blaðamannafundi í Sandgerðisbæ í gær.

Gagnageymslan verður einstök í heiminum að sögn Sol því að öll orka sem hún nýtir kemur frá endurnýjanlegum orkugjöfum. Áætluð orkuþörf fullbyggðrar gagnageymslu er tíu megawött. „Við hönnun húsnæðisins er leitast við að fella það eins mikið og hægt er inn í landslagið á Reykjanesi. Okkar von er að byggingarnar verði góð kynning fyrir framsækni Íslendinga í umhverfismálum, enda á mjög áberandi stað, rétt við alþjóðaflugvöllinn í Keflavík.“