Naldo með þrennu í stórsigri Bremen

Leikmenn Werder Bremen voru ekki lengi að hrista af sér vonbrigðin í Meistaradeildinni í vikunni þegar liðið malaði Frankfurt 6-2 á útivelli í þýsku úrvalsdeildinni í dag. Brasilíski varnarmaðurinn Naldo skoraði þrennu fyrir Bremen. Stuttgart lagði Bochum 1-0 og Bayern lagði Cottbus 2-1 með mörkum frá Schweinsteiger og Van Buyten.

Bremen er fyrir vikið í toppsæti deildarinnar með 33 stig, Stuttgart í öðru með 31 stig, Schalke í þriðja með 30 stig og leik til góða og meistarar Bayern eru í fjórða sæti með 30 stig sömuleiðis.