Abbas hættur að tala við Hamas

Mahmoud Abbas, forseti Palestínumanna, er hættur stjórnarmyndunarviðræðum við Hamas og mun kalla saman æðstaráð Frelsissamtaka Palestínu, PLO, til þess að ákveða framhaldið. Saeb Erekat, þingmaður á palestinska þinginu, skýrði frá þessu í dag.

Abbas hefur undanfarna mánuði verið að reyna að mynda þjóðstjórn með Hamas-samtökunum til þess að binda enda á refsiaðgerðir Vesturlanda. Bæði Bandaríkin og Evrópusambandið hættu öllum efnahagsstuðningi við heimastjórn Palestínumanna eftir að Hamas náði þar meirihluta á þingi.

Ísraelar hættu jafnframt að skila til Palestínumanna sköttum sem þeir innheimta fyrir þá. Heimastjórnin er því á hvínandi kúpunni og hefur ekki getað borgað laun í marga mánuði. Samtök arabaríkja hafa að vísu heitið stuðningi en það hefur verið lítið um efndir.