Reyndi að smygla eitruðum eðlum og snákum til Taílands

Tollvörðum í Taílandi tókst í dag að koma í veg fyrir að filippseyskri konu tækist að smygla rúmlega 100 baneitruðum snákum og eðlum til Taílands.

Eitthvað sem líktist lifandi snák kom í ljós þegar farangur konunnar var gegnumlýstur.

Þegar betur var að gáð fundu tollverðir tæplega 40 kóbraslöngur, rúmlega 20 höggorma og rúmlega 50 eðlur af ýmsri gerð, allt í allt 134 skriðdýr.

Ekki voru öll dýrin á lífi þegar töskurnar voru opnaðar og mörg þeirra geymd í gosflöskum. Konan var þegar færð til yfirheyrslu og er í haldi yfirvalda.