Bandarískur hermaður játar nauðgun og morð

Bandarískur hermaður hefur játað að hafa nauðgað 14 ára gamalli íraskri stúlku og hjálpað til við að myrða hana og fjölskyldu hennar. Lögfræðingur hans sagði að hann hefði játað á sig morðið til þess að reyna að komast hjá dauðrefsingunni. Hermaðurinn er einn fjögurra sem tóku þátt í verknaðinum.

Þeir eru allir ákærðir fyrir að hafa hjálpað fyrrum hermanni við að skipuleggja, framkvæma og að lokum að hylma yfir ódæðið. Hermaðurinn sem játaði verknaðinn hefur samþykkt að vinna með saksóknurum í málinu og mun vitna gegn hinum þremur sem ákærðir eru í málinu.