Hafa efasemdir um spár um hrun í dýraríki sjávar

Fiskistofnar og sjávarspendýr í höfum heimsins hrynja árið 2048 ef mannfólkið heldur áfram með uppteknum hætti að spilla umhverfi og lífríki sjávar, segja erlendir vísindamenn. Íslenskir útvegsmenn og fiskifræðingar eru ekki alveg eins vissir.

Þessi hrakspá er niðurstaða vísindamanna sem hafa unnið úr vísindagögnum sem ná aftur til sjöunda áratugarins og heimildum fornleifafræðinga um þróun lífríkisins í yfir þúsund ár. Niðurstöður vísindamannanna birtast í nýjasta tölublaði hins þekkta vísindatímarits Science.

Þar greinir frá því að 29 prósent tegunda séu þegar útdauðar eða í útrýmingarhættu. Þegar vísindamennirnir framreikna þessa þróun fyrir næstu áratugina reikna þeir með að árið 2048, eða eftir aðeins 42 ár, hafi heildarafli í heiminum minnkað um níutíu prósent. Þetta gildir um allar tegundir sjávarlífvera, allt frá svifi og skeldýrum til þorsks og túnfisks. Sjávarspendýr, eða selir og hvalir, verða ekki undanskilin áhrifunum af hruni fiskstofna því þá verður minna um æti fyrir þessi dýr.

Útvegsmenn og fiskifærðingar sem NFS ræddi við í morugn, hafa að vísu ekki séð greinina en segja að veiðum sé sjálfhætt löngu áður en stofnunum yrði endanlega útrýmt þar sem þá væri löngu hætt að borga sig að stunda veiðar úr þeim. Nær væri að ganga til þess verks að útryma ríkisstyrkjum til óarðbærra veiða, eins og Evrópusambandið stundar meðal annarra. Þá muni efnahagslífið og lífríkið vinna saman úr vandanum.