Lögreglan lúskraði á mótmælendum

Lögreglan í Búdapest í Ungverjalandi beitti táragasi gegn mótmælendum sem safnast höfðu saman við þinghús landsins til að minnast þess að hálf öld er í dag liðin frá því að uppreisn hófst gegn leppstjórn Sovétmanna í landinu.

Það var þennan dag árið 1956 sem hópur ungverskra stúdenta fylkti liði að þinghúsinu í Búdapest til að mótmæla ungversku ríkisstjórninni, sem á þeim tíma var einungis taglhnýtingingur ráðsherranna í Kreml. Uppreisnin breiddist fljótt út um landið og stjórnin féll. Tólf dögum síðar réðist Rauði herinn inn í landið og barði niður uppreisnina af mikilli hörku. 2.600 Ungverjar létust í átökum og 200 til viðbótar voru teknir af lífi. Um 200.000 manns flýðu land. Fátt benti til þess í dag að atburðurnir fyrir fimmtíu árum hefðu þjappað þjóðinni saman. Þvert á móti logaði allt í átökum fyrir utan þetta sama þinghús í dag. Um eitt þúsund mótmælendur voru þar samankomnir til að láta í ljós óánægju sína með forsætisráðherrann Ferens Djúrsjaní en á dögunum kom í ljós að hann hefði logið ítrekað að kjósendum um efnahagsástandið. Lögreglan tók mótmælendur engum vettlingatökum heldur skaut á þá gúmmíkúlum og dreifði táragasi. Nokkrum þeirra tókst að komast um borð í skriðdreka, sem stóð á torginu til minningar um byltinguna, og aka honum nokkurn spöl. Nú undir kvöld var ástandið farið að róast en þá höfðu nokkrir verið handteknir og allmargir meiðst.