Forsetalisti HR birtur

Bestu nemendur Háskólans í Reykjavík voru heiðraðir við hátíðlega athöfn í skólanum í dag. Að þessu sinni hlutu 65 nemendur viðurkenningu fyrir frábæran námsárangur á síðustu önn. Þessir nemendur komust á svokallaðan Forsetalista Háskólans í Reykjavík, en það þýðir að þessir nemendur fá felld niður skólagjöld við HR á yfirstandandi önn.

Við athöfnina í dag var skrifað undir 3ja ára samstarfssamning á milli Háskólans í Reykjavík og Straums Burðaráss Fjárfestingarbanka. Félagið hefur um langt árabil styrkt nemendur viðskiptadeildar skólans, en nýi samningurinn felur í sér að Straumur Burðarás greiðir skólagjöld allra bestu nemenda HR á næstu þremur árum.