Nýr sendiherra í Úkraínu

Hannes Heimisson, sendiherra, hefur afhent Viktor Jústsjenkó, forseta Úkraínu, trúnaðarbréf sem sendiherra Íslands í Úkraínu með aðsetur í Helsinki. Fór afhendingin fram í embættisbústað forsetans í höfuðborginni Kiev á fimmtudag. Sendiherra átti einnig fundi með Borys Tarasyuk, utanríkisráðherra Úkraínu og embættismönnum utanríkisráðuneytisins.

Fram kemur í frétt á vef utanríkisráðuenytisins að á fundinum með utanríkisráðherranum hafi meðal annars verið rætt um undirbúning opinberrar heimsóknar Valgerðar Sverrisdóttur, utanríkisráðherra til Úkraínu 6. til 9. nóvember næstkomandi og vaxandi samskipti ríkjanna. Ráðherrann hafi einnig verið upplýstur um áherslur Íslands í framboði til öryggisráðs Sameinuðu þjóðanna.

Í för með utanríkisráðherra verður fjölmenn viðskiptasendinefnd. Útflutningsráð og utanríkisráðuneyti vinna að undirbúningi heimsóknar viðskiptasendinefndarinnar í nánu samstarfi við Kostyantyn Malovanyy, kjörræðismann Íslands í Kiev.

Í frétt utanríkisráðuneytisins segir að fjárfestingar Íslendinga í Úkraínu hafi aukist mjög að undanförnu, einkum með kaupunum á Bank Lviv, banka í samnefndri borg í vesturhluta Úkraínu, undir forystu Margeirs Péturssonar, stjórnarformanns MP fjárfestingarbanka.