Allt hlutafé FL Group í Icelandair selt

FL Group hefur selt allt sitt hlutafé í Icelandair. Forstjóri félagsins segir mikla vaxtarmöguleika í flugi og ferðaþjónustu og áætlar að starfsfólki verði fjölgað en ekki fækkað með nýjum eigendum.

Þrír hópar fjárfesta hafa keypt 50,5% hlut í Icelandair Group. Stærsta hlutinn, 32%, keypti Langflug ehf sem er að mestu í eigu Samvinnutrygginga með Finn Ingólfsson í fararbroddi, þá er það Naust ehf, eða eigendur Essó, sem keypti rúm 11% og svo Blue Sky Transport Holding sem er að mestu í eigu Ómars Benediktssonar sem keypti rúm 7% en Ómar var áður einn af eigendum Íslandsflugs.

Þriðjungur hlutafjárins verður boðinn fjárfestum og almenningi í almennu hlutafjárútboði. Nú þegar er hins vegar búið að ráðstafa um 67%hlutafjárins en 4% eru tekin frá fyrir starfsmenn sem hafa áhuga og lykilstjórnendur ætla sömuleiðis að kaupa.

Jón Karl Ólafsson, forstjóri Icelandair, segir stjórnendur hafa trú á fyrirtækinu. Gríðarlegir vaxtamöguleikar séu í þessum geira á Íslandi, það er í ferðaþjónustu og flutningastarfsemi. Stjórnendur Icelandair hafi sagt að hér sé hægt að fá milljón ferðamenn á ári, það sé einungis spurning um vilja og hvað fjárfestar séu tilbúnir til að leggja fram.

Jón Karl segir engar breytingar verða á fyrirtækinu. Félagið sé í góðum rekstri og skilað góðum árangri undanfarið ár. Áhugasvið nýrra fjárfesta séu þetta og þeir líti á þetta sem langtíma fjárfestingu.

Jón Karl neitar því að hagræðing fylgi þessum nýju eigendum Icelandair en starfsmenn félagsins eru um 2.700. Ekkert liggi fyrir um breytingar þar á, heldur þvert á móti. Ætlunin sé sú að stækka fyrirtækið um 17% á næsta ári og það þýði fjölgun á starfsfólki.