Frjálslyndi armurinn hefur náð yfirhöndinni

Frjálslyndur armur Sjálfstæðisflokksins hefur náð yfirhöndinni, segir stjórnmálafræðingur í framhaldi af því að Kjartan Gunnarsson hættir sem framkvæmdastjóri flokksins. Ungur lögmaður, Andri Óttarsson, tekur við þessari valdamiklu stöðu af Kjartani.

Andri Óttarsson sem tekur við af Kjartani á næstu vikum er rösklega þrítugur lögmaður og lagði í fyrra stund á meistaranám í mannréttindum. Honum líst vel á starfið en gerir ekki ráð fyrir stefnubreytingu við mannaskiptin.

Geir H. Haarde forsætisráðherra var kampakátur þegar hann gekk út af miðstjórnarfundinum í dag. Hann sagði Sjálfstæðisflokkinn þakklátan fyrir störf Kjartans Gunnarssonar og neitaði því að pólitík hefði áhrif á brottför hans. Þetta væru kynslóðaskipti.

Einar Mar Þórðarson stjórnmálafræðingur segir ýmislegt mega lesa í val á eftirmanni Kjartans Gunnarssonar, enda komi Andri úr ungliðahreyfingunni þar sem átökin milli frjálshyggjuarmsins og hins frjálslyndari hafi verið hvað skýrust. Segja megi að nú hafi frjálslyndi armurinn náð yfirhöndinni í flokknum.