Olíuverð lækkar frekar

Heimsmarkaðsverð lækkaði um 2 bandaríkjadali og fór niður fyrir 71 dal á helstu mörkuðum í dag í kjölfar fregna þess efnis að hitabeltisstormurinn Ernesto, sem nú nálgast suðurströnd Bandaríkjanna, fari framhjá olíuborpöllum við Mexíkóflóa.

Styrkur Ernestos var í gær lækkaður úr fellibyl niður í hitabeltisstorm en hann var um hríð fyrsti fellibylurinn til að ríða yfir á þessu fellibyljatímabili, sem nú er að hefjast. Að sögn fellibyljamiðstöðvarinnar í Miami í Bandaríkjunum getur svo farið að Ernesto verði fellibylur á nýjan leik innan skamms.

Hráolíuverð lækkaði um 1,91 dal á mörkuðum í Bandaríkjunum og fór í 70,60 dali á tunnu en verð á Norðursjávarolíu lækkaði um 1,64 dali og fór í 71,06 dali á tunnu á markaði í Bretlandi.

Hráolíuverð hefur hækkað um 16 prósent það sem af er árs. Hæst fór það í 78,40 dali á tunnu um miðjan júlí eða um það leyti sem Ísraelsher gerði innrás inn í suðurhluta Líbanon.