Óvænt uppsögn hjá McDonald's

Mike Roberts, einn af æðstu stjórnendum skyndibitakeðjunnar McDonald's, sagði upp störfum í gær. Uppsögnin kemur talsvert á óvart en gert var ráð fyrir að Roberts yrði næsti forstjóri keðjunnar.

Þegar hefur verið ráðið í stöðu Roberts, sem hóf störf hjá McDonald's sem innkaupastjóri árið 1977 en hefur gegnt stöðu aðstoðarforstjóra frá því í nóvember árið 2004.

Gengi hlutabréfa í skyndibitakeðjunni hafa hækkað um 5,5 prósent í kauphöllinni í New York í Bandaríkjunum það sem af er árs en um 21 prósent síðan Roberts tók við starfi sínu. Þegar greint var frá uppsögninni í gær féll gengið hins vegar um 1,1 prósent og stendur það í 35,59 dölum á hlut.