Capello tekinn við Real Madrid

Þjálfarinn sterki Fabio Capello hefur tekið við þjálfun spænska stórliðsins Real Madrid. Þetta var staðfest á blaðamannafundi í Madrid í dag. Capello var áður hjá liði Juventus á Ítalíu þar sem hann gerði liðið að tvöföldum meisturum, en eins og flestir vita á ítalska félagið nú undir högg að sækja vegna spillingarmálsins stóra. Capello er öllum hnútum kunnugur á Bernabeu, þar sem hann stýrði Real til sigurs í spænsku deildinni þegar hann stýrði liðinu árið 1997.

Capello stýrði Real aðeins í eitt ár á sínum tíma, en Calderon forseti sagði mikilvægt að fá sigurvegara til að þjálfa liðið nú þegar það hefði ekki unnið titil í þrjú ár - en það þykir hreint út sagt glæpsamlegt á þeim bænum. Capello er sextugur og hefur verið ótrúlega sigursæll á ferli sínum, þar sem hann hefur m.a. stýrt Real Madrid, Juventus, AC Milan og Roma - sem öll urðu meistarar undir hans stjórn.