Fabregas spenntur yfir áhuga Real Madrid

Umboðsmaður táningsins efnilega Cesc Fabregas hjá Arsenal, segist ekki geta neitað því að skjólstæðingur hans sé spenntur yfir miklum áhuga spænska stórliðsins Real Madrid á að fá hann í sínar raðir. Nýkjörinn forseti Real hefur lýst því yfir að hann ætli að krækja í stjörnuna ungu, en hann er með langtímasamning við Arsenal og það verður því að teljast nokkuð langsótt.

"Auðvitað er Cesc samningsbundinn Arsenal og hefur oft lýst því yfir að hann sé fullkomlega ánægður í herbúðum liðsins, en þegar stærsta félag í heimi bankar á dyrnar hjá þér - verður þú auðvitað upp með þér og forvitinn," sagði umboðsmaðurinn og sagði ekkert öruggt í fótboltanum - þó Arsenal hefði engan áhuga á að selja drenginn, gæti það allt eins átt eftir að breytast á morgun.