Lippi í skýjunum

Marcello Lippi,landsliðsþjálfari Ítala, hrósaði liði sínu í hástert eftir sigurinn á Tékkum í dag og kallaði baráttuandann í sínum mönnum einn þann mesta sem hann hefði orðið vitni að á ferli sínum sem þjálfari.

"Það er ótrúlegur baráttuandi í þessu liði, líklega meiri en í nokkru liði sem ég hef þjálfað. Við áttum sannarlega skilið að komast áfram í keppninni eftir að hafa borið sigurorð af tveimur mjög sterkum liðum í riðlakeppninni. Það var mikilvægt að vinna riðilinn, en við hefðum viljað sigra þó það hefði jafnvel þýtt að við fengjum Brasilíu í næstu umferð. Ef maður ætlar sér langt á svona móti, þarf maður hvort sem er að fara í gegn um lið eins og Brasilíu einhversstaðar á leiðinni og það er því alveg eins gott að gera það snemma," sagði Lippi ánægður í leikslok.