Ótrúlegur sigur Miami

Miami Heat forðaði sér naumlega frá því að lenda undir 3-0 í lokaúrslitum NBA í nótt þegar liðið vann afar dramatískan sigur á Dallas Mavericks á heimavelli sínum 98-96. Svo virtist sem lið Miami væri heillum horfið í gær, en liðið var á kafla 13 stigum undir í fjórða leikhluta. Dwyane Wade bar sína menn á herðum sér og skoraði 42 stig og hirti 13 fráköst fyrir Miami.

Dirk Nowitzki hafði tækifæri til að jafna leikinn í lokinn, en klikkaði á vítaskoti og mistókst að jafna leikinn á meðan Shaquille O´Neal fór skyndilega að hitta úr sínum. Shaq skoraði 16 stig og hirti 11 fráköst hjá Miami.

Dirk Nowitzki skoraði 30 stig fyrir Dallas og Josh Howard skoraði 21 stig, en þetta var fyrsti leikurinn af síðustu 25 sem Dallas tapar þegar Howard skorar 20 stig eða meira. Leikmenn Dallas geta sannarlega nagað sig í handarbökin að hafa ekki klárað leikinn í nótt - því sigur hefði nánast tryggt liðinu titilinn. Þess í stað er nú meðbyrinn allur á bandi Miami, sem fær tvo næstu leiki einnig á heimavelli sínum.

Næsti leikur verður á fimmtudagskvöld og verður sýndur beint á Sýn klukkan eitt eftir miðnætti, en einvígið tók áhugaverða stefnu þegar Miami tókst að tryggja sér sigurinn í gær og segja má að nú geti allt gerst.