Sjálfsvíg í Guantanamo-fangelsinu

Þrír fangar í Guantanamo-fangelsi Bandaríkjamanna á Kúbu fundust látnir í klefum sínum í gær. Að sögn Bandaríkjahers hengdu þeir sig allir með snöru sem þeir höfðu sjálfir búið til úr rúmfötum og fatnaði.

Talsmaður hersins segir lífgunartilraunir ekki hafa borið árangur og bætti því við að sjálfsvíg mannanna væru hernaðaraðgerðir. Þetta eru fyrstu fregnir sem borist hafa af dauðsföllum meðal fanga í Guantanamo þar sem meintum hryðjuverkamönnum hefur mörgum hverjum verið haldið á fimmta ár án þess að þeir séu ákærðir.

Tveir mannanna voru frá Sádí-Arabíu og sá þriðji frá Jemen. Mennirnir voru í haldi í búðum eitt þar sem öryggisgæsla er sögð hvað mest. Þar reyndu tveir aðrir fangar að svipta sig lífi í síðasta mánuði þegar óeirðir brutust út í fangelsinu.