Stórtónleikar í München vegna HM

Fótboltamenn og áhugamenn fengu fullt fangið af tónlist á upphitunartónleikum fyrir HM sem haldnir voru í München í gær. Placido Domingo söng fyrir gestina, og hafði heilar þrjár hljómsveitir sér til halds og trausts. FIFA heldur nú ráðstefnu í München og sáust þó nokkrir ráðstefnugestir nýta frítímann til tónleikasetu.

En það var öðruvísi tónlist sem hljómaði í bænum Wangen, nærri austurrísku landamærunum, þar sem áhangendur landsliðs Tógó studdu sína menn dyggilega í upphitunarleik við félagslið í héraðinu. Tógó er eitt fjögurra Afríkuliða sem tekur nú þátt í heimsmeistarakeppninni í fyrsta sinn og því margir samlandar liðsins sem lögðu leið sína til Evrópu til að berja bumbur sínu liði til stuðnings.