Albert prins gengst við 14 ára dóttur

Albert, prins af Mónakó, á 14 ára gamla dóttur sem býr í Kaliforníu í Bandaríkjunum. Lögmaður hans staðfesti þetta í viðtali við franska blaðið Le Figaro í gær.

Stúlkan kom undir í ástarævintýri sem prinsinn átti með móður hennar á sólarströnd árið 1991 en ekki kemur fram í viðtalinu hvar það var. Mæðgurnar búa í bænum Palm Desert í Kaliforníu og varð uppi mikið fjölmiðlafár við skóla stúlkunnar í gær þegar ljóst var að blátt blóð rynni um æðar hennar og var því gripið til þess ráðs að kalla á lögregluna.

Lögmaður Alberts, sem er 48 ára og enn einhleypur, sagði að prinsinn hafi ekki ætlað sér að ljóstra þessu upp fyrr en stúlkan væri orðin fullorðin, en hennar vegna hafi verið ákveðið að gera það núna.