Cleveland - Detroit í beinni á NBA TV

Fjórði leikur Cleveland Cavaliers og Detroit Pistons verður sýndur beint á NBA TV klukkan 23 í kvöld. Detroit hefur yfir 2-1 í einvíginu eftir að hafa tapað síðasta leik og LeBron James og félagar munu því tjalda öllu til að jafna metin á heimavelli sínum í kvöld.

Flestir voru á því að Cleveland yrði Detroit lítil fyrirstaða eftir auðveldan sigur Detroit í fyrstu tveimur leikjunum, en Cavaliers sýndu klærnar í síðasta leik og ætlaði liðið greinilega ekki að láta sópa sér úr keppni. Það verður því afar forvitnilegt að sjá hvernig heimamönnum tekst til í kvöld.

"Við munum vinna þetta einvígi og látum ekki eitt tap breyta neinu þar um," sagði Rasheed Wallace, leikmaður Detroit, en yfirlýsingar hans hafa í gegn um tíðina átt það til að verða að veruleika síðan liðið vann titilinn árið 2004.

Ljóst er að Cleveland mun treysta mikið á ungstirnið LeBron James í kvöld, en hann var með þrefalda tvennu og skoraði 15 stig í fjórða leikhlutanum í þriðja leiknum. "Drengurinn nær þrefaldri tvennu í annari umferð úrslitakeppninnar á móti besta liði deildarinnar og það segir sína sögu um það hvað hann er að verða rosalegur leikmaður. Ég hef sagt það í allan vetur - hann er mjög sérstakur," sagði Mike Brown, þjálfari Cleveland.