Real Madrid burstaði Deportivo

Real Madrid vann öruggan sigur á Deportivo La Coruna í La Liga á Spáni í dag. Madrídingar færast þar með nær erkifjendum sínum í Barcelona sem verma toppsæti deildarinnar en þeir náðu þó aðeins markalausu jafntefli gegn Malaga í gær.

Strax á níundu mínútu komust Real Madrid yfir þegar Hector setti boltann í eigið net. Ronaldo, sem hefur verið gagnrýndur mikið á undanförnum vikum, skoraði síðan annað mark Real fyrir háfleikinn og heillum horfnir Deportivo menn vissu ekki sitt rjúkandi ráð.

Varnarmaðurinn Sergio Ramos kom Madrídíngum í 3-0 áður en Julio Baptista innsiglaði sigurinn með góðu marki á lokamínútum leiksins.

Í öðrum leikjum þá vann Celta Vigo 2-0 sigur á Mallorca, Getafe lagði Real Sociedad 2-1 og þá urðu tvö markalaus jafntefli, hjá Racing Santander og Real Zaragoza annarsvegar og hjá Espanyol og Alaves hinsvegar.