Real Madrid niðurlægt

Stjörnulið Real Madrid var tekið í sannkallaða kennslustund í kvöld þegar liðið sótti Real Zaragoza heim í fyrri leik liðanna í undanúrslitum spænska bikarsins. Zaragoza sigraði 6-1 og eru möguleikar Madrid ansi litlir fyrir síðari leikinn, en hætt er við því að stuðningsmenn liðsins eigi eftir að láta vel í sér heyra eftir þennan skell.

Argentínumaðurinn Diego Milito skoraði fjögur mörk fyrir Zaragoza, þar af þrjú á tæplega 20 mínútna kafla í fyrri hálfleiknum, en eftir að Julio Baptista hafði minnkað muninn fyrir Madridarliðið, bætti Brasilíumaðurinn Ewerthon við tveimur mörkum og fullkomnaði niðurlægingu stórliðsins. Sigur Zaragoza var í raun síst of stór, því fjöldi færa fór í súginn hjá liðinu og smullu nokkur skot liðsins í markstöngunum og nokkur voru hreinsuð af marklínu Real Madrid.

Zaragoza er mikið bikarlið og hefur unnið spænska bikarinn tvisvar sinnum á undanförnum árum, en liðið sló sem kunnugt er meistara Barcelona út úr keppninni fyrir skömmu.