Óhress með gamla stjórann sinn

Mark Hughes segist óhress með ummæli fyrrum knattspyrnustjóra síns hjá Manchester United eftir leik liðanna í gær, en Sir Alex Ferguson fór þar mikinn í að gagnrýna grófan leik Blackburn.

"Ég er orðinn leiður á því að lið mitt sé stimplað fyrir ruddamennsku og ég hélt að við hefðum losnað við þá brennimerkingu í vetur. Ég er vonsvikinn að heyra ummæli Alex eftir leikinn og ef ég á að segja alveg eins og er, skemmdu þau fyrir mér góðan sigur okkar að nokkru leiti," sagði Hughes, sem um árabil spilaði í framlínu Manchester United undir stjórn Ferguson.