Kemst líklega ekki í gegnum niðurskurðinn

Möguleikar Michelle Wie á að verða fyrsta konan í 61 ár til að komast í gegnum niðurskurð á PGA-mótaröð karla eru nánast engir eftir að hún lék fyrsta hringinn á Sony-mótinu á níu höggum yfir pari.

Hin 16 ára gamla Wie hafði gert sér vonir um að komast áfram í næstu umferð og skrá sig þannig í sögubækurnar. Hún höndlaði hins vegar engan veginn álagið í hvassviðrinu á Hawaii í gær.

"Ég hugsaði með mér: Vá, ég get ekki verið að standa mig svona illa. En hvað get ég sagt? þetta var einfaldlega ekki minn dagur," sagði Wie eftir að hafa lokið hringnum. Vijay Singh er í forystu eftir fyrsta leikdag en hann lék á fimm höggum undir pari.