Stal myndavélum og úrum

Tæplega tvítugur maður var dæmdur í Héraðsdómi Reykjavíkur í gær í þriggja mánaða fangelsi fyrir þjófnaði og gripdeildir. Refsingin er skilorðsbundin í tvö ár.

Maðurinn braust inn í íbúðarhúsnæði síðastliðið sumar og stal tveimur stafrænum myndavélum og þremur úrum. Síðar braust hann inn í bíl og lét þar greipar sópa. Hann hafði áður hlotið dóm fyrir tilraun til þjófnaðar. Dómurinn leit meðal annars til ungs aldurs og þess að maðurinn játaði brot sín hreinskilnislega. Þá hefur hann tekist á við fíkniefnavanda sinn.