Harmur eftir blóðbað í skólum

Bandaríkjamenn eru sem í losti eftir röð skotárása í grunnskólum landsins síðustu daga. Í gær dóu úr sárum sínum á sjúkrahúsi tvær stúlkur til viðbótar þeim þremur sem dóu samstundis er 32 ára gamall karlmaður úr nágrenninu skaut á alls ellefu skólastúlkur í litlum skóla Amish-fólks í friðsælli sveit um 80 km vestur af Fíladelfíu í Penn­sylvaníuríki í fyrradag.

Hinar stúlkurnar sex eru enn á sjúkrahúsi með misalvarleg skotsár.

Ódæðismaðurinn svipti sig lífi er lögregla réðst til inngöngu í skólann.

Þetta var fjórða og alvarlegasta skotárásin í bandarískum skólum á nokkrum dögum. George W. Bush Bandaríkjaforseti brást við þessum hörmungarfréttum í gær með því að gefa dómsmálaráðherranum Alberto Gonzalo og menntamálaráðherranum Margaret Spelling fyrirmæli um að fá fulltrúa löggæslu- og menntamálayfirvalda til viðræðna um aðgerðir til að hindra að slíkt endurtæki sig. Dana Perino, talsmaður forsetans, greindi frá þessu í gær. Hún sagði að í viðræðunum ætti að ræða hvernig alríkisstjórnin gæti beitt sér til að bæta öryggi í skólum landsins og til að hjálpa þeim samfélögum sem orðið hafa fyrir ofbeldisglæpum af þessu tagi. Í næstu viku væri áformað að halda ráðstefnu með fulltrúum alríkislögreglunnar FBI og samtaka kennara og foreldra. „Það fyllir bandarísku þjóðina óstjórnlegum harmi þegar saklaus skólabörn eru tekin í gíslingu og þau skotin niður,“ sagði Perino.

Harmleikurinn í fyrradag hófst með því að mjólkurbílstjórinn Charles C. Roberts ók á pallbíl sínum að litla barnaskólanum í Amish-sveitaþorpinu Nickel Mines um kl. hálfellefu að morgni, óð þar inn vopnaður skammbyssu og haglabyssu, auk skot- og verkfæra. Þá voru um 30 manns staddir í einu skólastofu hússins og maðurinn byrjaði á því að senda alla drengi út. Ófrískri kennslukonunni tókst líka að komast undan. Eftir urðu fimmtán ára aðstoðarstúlka kennarans og tíu stúlkur á aldrinum sex til þrettán ára. Hann lét þær raða sér upp við töfluna við enda stofunnar og batt þær á höndum og fótum með vír og límbandi. Þá negldi hann fyrir dyrnar með viðarplönkum sem hann hafði meðferðis.

Kennslukonan sem komst undan gat gert lögreglu viðvart frá nálægum sveitabæ. Enginn sími var í skólanum, þar sem Amish-fólk reynir að lifa án allra nútíma tæknitóla. Og glæpir eru nánast óþekktir í sveitasamfélagi hins hlédræga og friðelskandi sértrúarsöfnuðar.

Er lögreglan kom á vettvang gat hún lítið gert. „Hann raðaði þeim upp greinilega eins og við aftöku og skaut þær í höfuðið,“ sagði talsmaður lögreglunnar. Þegar lögreglumennirnir höfðu brotið sér leið inn í skólastofuna blasti við hryllileg sjón. Tvær stúlkur voru látnar, auk ódæðismannsins sem hafði skotið sjálfan sig í höfuðið. Ein stúlkan dó í örmum lögreglumanns er hann var að bera hana út til að hún kæmist undir læknishendur.

„Hann vildi finna kvenkyns fórnarlömb,“ sagði Jeffrey B. Miller hjá ríkislögreglu Pennsylvaníu. Roberts var sjálfur ekki meðlimur Amish-trúfélagsins þótt hann byggi í nágrenninu. „Hann var reiður út í eigið líf, út í Guð,“ sagði Miller. „Það lítur út fyrir að hann hafi valið þennan skóla vegna þess að hann var í nágrenni við heimili hans, vegna þess að þar voru kvenkyns fórnarlömb sem hann leitaði að, og sennilega vegna þess að það var auðveldara að vaða þar inn en í stærri skóla.“

Roberts var þriggja barna fjölskyldufaðir og hvorki á sakaskrá né var vitað til að hann hefði átt við geðræn vandamál að stríða. Hann kvað hafa talað við eiginkonu sína í síma úr skólastofunni, rétt áður en hann hóf skothríðina. Hann á að hafa sagt við hana: „Löggan er komin. Ég kem ekki heim.“ Að sögn lögreglu sagði hann eiginkonunni að hann væri að hefna fyrir eitthvað sem var gert á hans hlut fyrir tuttugu árum. Miller vildi ekki greina nánar frá því hvað það hefði verið.

Miller tjáði NBC-sjónvarpsstöðinni að Roberts-hjónin hefðu misst dóttur „um það bil fyrir þremur árum“ og það kynni að hafa átt þátt í því sem rak Roberts til að fremja ódæðið.

Roberts skildi eftir kveðjubréf heima hjá sér, eftir að hann skilaði börnum sínum í skólabílinn. Að sögn Millers höfðu samstarfsmenn Roberts upplýst að hann hefði verið þunglyndur síðustu mánuði, en hefði síðan mætt til vinnu óvenju kátur í lok síðustu viku. Telur lögreglan það vísbendingu um að hann hafi þá verið búinn að ákveða innra með sér að kveðja þennan heim með þeim skelfilega hætti sem raunin varð.

Í skriflegri yfirlýsingu frá eiginkonu Roberts, Marie, segir hún eiginmann sinn hafa verið „ástríkan og umhyggjusaman föður“ sem hefði „aldrei vikið sér undan því að hjálpa til við að skipta um bleyju“.

Árás Roberts átti sér nokkra hliðstæðu við árás sem heimilislaus maður gerði í skóla í Bailey í Colorado í síðustu viku, en að sögn Millers er talið ólíklegt að um hermiglæp sé að ræða. Í árásinni í Bailey tók árásarmaðurinn sex stúlkur í gíslingu. Hann skaut eina þeirra til bana og síðan sjálfan sig. Sá kvað hafa verið kynferðisafbrotamaður.

Síðastliðinn föstudag skaut fimmtán ára piltur skólastjórann í gamla skólanum sínum til bana í Cazenovia í Wisconsin. Fyrir tveimur vikum gekk vopnaður maður berserksgang í skóla í Montreal í Kanada og drap eina konu og særði nítján manns, marga alvarlega. Á mánudag var vopnaðs nemanda í skóla í Las Vegas í Nevada leitað af lögreglu.