Hafa tekið tvo bæi í Sómalíu

Hundruð eþíópískra hermanna fóru í fyrradag inn í sinn annan bæ í Sómalíu til að styðja stjórn stríðsherra í landinu. Eþíópísk stjórnvöld neita að hafa sent herlið inn í landið en íbúar og starfsmenn Sameinuðu þjóðanna eru á öðru máli. Auk þess sveima herþyrlur um svæðið, en engin slík er í eigu sómalska hersins.

Herinn hóf innreið sína síðastliðinn fimmtudag og í kjölfarið lauk friðarviðræðum stjórnar stríðsherranna við íslamska bókstafstrúarmenn. Múslimarnir gengu út af fundinum og sögðu vopnahlé hafa verið rofið með innrás hers Eþíópíu.