HK sigraði Fram

HK skellti Fram 30-20 í Digranesi í DHL deild kvenna í handknattleik í kvöld, eftir að staðan hafði verið 13-9 fyrir HK í hálfleik. Það var Arna Sif Pálsdóttir sem var atkvæðamest í liði HK með 9 mörk, en hin 15 ára gamla Rut Jónsdóttir skoraði 7 mörk úr aðeins 8 skotum, öll í síðarihálfleik. Markahæst hjá Fram var Sigurbjörg Jóhannsdóttir með 9 mörk og Ásta Birna Gunnarsdóttir skoraði 5 mörk. Kobrún Ragnarsdóttir var þó að öðrum ólöstuðum maður leiksins, en hún varði 26 skot í marki HK og varði rúm 60% skota sem á hana komu í leiknum. Kolbrún er aðeins 17 ára gömul og er þetta frábær árangur hjá henni. Stjörnustúlkur gerðu góða ferð í Kaplakrika og höfðu sigur 25-23. KA/Þór burstaði Víking fyrir norðan 35-23 og þá tapaði Grótta fyrir Val á heimavelli, 21-19. Leik ÍBV og Hauka var frestað vegna veðurs.