Beckham sló mótherja sinn

Sergio Sanches, leikmaður Espanyol á Spáni, sagði að David Beckham hefði slegið sig í göngunum þegar leikmenn gengu af velli eftir tap Real Madrid gegn Espanyol í spænsku deildinni um helgina. "Ég var að hita upp á hliðarlínunni þegar hann var að taka hornspyrnu og varð á að hósta þegar hann framkvæmdi spyrnuna. Hann virðist hafa fipast eitthvað við það, því hann sendi mér tóninn og kallaði mig öllum illum nöfnum í kjölfarið. Svo þegar við gengum til búningsherbergja, sló hann mig og kallaði mig hóruson," sagði Sanches og benti á að það hefði verið enska landsliðsfyrirliðanum til happs að menn hefðu gengið á milli þeirra á göngunum. Beckham sagði málið blásið úr samhengi. "Hann var eitthvað að þenja sig þegar ég tók hornið og öskraði eitthvað á mig. Ég tek það ekki nærri mér, þetta er bara hluti af leiknum," sagði hann.