Loksins mætast Klitschko og Rahman

Eftir langa mæðu virðist nú bardagi þeirra Vitaly Klitschko og Hasim Rahman loksins ætla að fara fram og hefur verið settur á 12. nóvember í Las Vegas í Bandaríkjunum. Viðureign þeirra félaga hefur verið frestað í tvígang vegna meiðsla Úkraínumannsins. Blaðamannafundurinn þar sem bardagi þeirra var kynntur, var í meira lagi skrautlegur. Rahman settist niður við borðið, en skrapp frá í stutta stund og sneri loks aftur með matreiðsluhúfu á höfðinu. Þegar hann var spurður af hverju hann væri með kokkahúfu á höfðinu, svaraði hann því til að hann hefði verið að elda kjúkling handa Klitschko, nú þegar hann hefði komist að því að hann væri ekki hæna sjálfur. Úkraínumaðurinn var ekki sérlega hrifinn af þessum uppátækjum og varð greinilega nokkuð reiður, en tók þátt í gríninu og sagðist þakka fyrir matinn, en sagðist myndi éta Rahman í eftirmat þann 12. nóvember. Sem betur fer eru þessir miklu húmoristar hnefaleikamenn að atvinnu en ekki grínistar og nú er bara að sjá hvor þeirra kemur út eins og brandarakarl í hringnum í nóvember.