Einn sprengjumanna sagður í haldi

Breska lögreglan réðst til inngöngu í hús í Birmingham fyrir dögun í gærmorgun og beittu rafbyssu til að yfirbuga mann sem að sögn vitnis og fjölmiðla er sagður vera Yasin Hassan Omar, einn þeirra fjögurra sem reyndu að sprengja sprengjur í jarðlestum og strætisvagni í Lundúnum fyrir viku. Sprengjusérfæðingar lögreglunnar, sumir í brynklæðum, sáust fara inn í bygginguna eftir að lögregla hafði rekið fólk úr um 100 nærliggjandi húsum. Húsið þar sem handtakan fór fram er í friðsælu hverfi þar sem fólk af ýmsum uppruna býr hvað innan um annað. Þrír aðrir menn voru handteknir í áhlaupi lögreglu á annað hús í Birmingham í gærmorgun. Engum skotum var hleypt af. Þá var einn maður handtekinn á Luton-flugvelli nærri Lundúnum, í nafni hryðjuverkavarnalaga. Maðurinn var á leið til Frakklands. Lögregla vildi ekkert segja um hvers vegna maðurinn var handtekinn, en samkvæmt heimildum fjölmiðla líktist hann einum hinna eftirlýstu. Lögreglan vildi heldur ekki staðfesta fregnir fjölmiðla um að sá sem fyrstur var handtekinn í Birmingham væri Omar. Að minnsta kosti eitt vitni sagði hinn handtekna líkjast mjög eftirlýsingarmyndinni af Omar, sem er 24 ára að aldri og fluttist sem barn til Bretlands frá Sómalíu. Lundúnalögreglan leitaði líka í tveimur íbúðum í norðurhluta borgarinnar í gær, í hverfunum Finchley og Enfield. Enginn var handtekinn í þeim, en vettvangsrannsóknargögnun safnað, að sögn talsmanns lögreglunnar. Með handtökunum í Birmingham eru nú alls níu manns í haldi lögreglu í tengslum við rannsókn sprengjutilræðanna 21. júlí. Auk þess voru tveir menn handteknir í lest á leið frá Newcastle til Lundúna seint í fyrrakvöld. Fóru þær handtökur einnig fram í nafni hryðjuverkavarnalaga, en ekki var upplýst frekar hvort þær tengdust rannsókninni á Lundúnaárásunum.