Hinn skotni ótengdur árásum

Lögreglan í London staðfesti í gær að maðurinn sem lögreglan skaut til bana í neðanjarðarlest í borginni síðastliðinn föstudag hefði verið alls ótengdur sprengjuárásunum sem áttu sér stað í London daginn áður. Scotland Yard sagði í tilkynningu í gær að maðurinn hefði að öllum líkindum einnig verið ótengdur sprengjuárásunum sem áttu sér stað 7. júlí. Í tilkynningunni sagði jafnframt að atburðurinn hefði verið hryggilegur og að Lundúnalögreglan harmaði hann. Þá kom fram að lögreglan vissi hver hinn látni væri þótt enn ætti eftir að bera formleg kennsl á hann. Rannsóknarnefnd lögreglunnar mun fara yfir tildrög atviksins. Maðurinn kom út úr húsi sem var undir eftirliti lögreglu vegna meintra tengsla íbúa við hryðjuverkin. Maðurinn var af suður-asískum uppruna og klæddur í þykka úlpu þrátt fyrir sumarhitann og var með bakpoka á bakinu. Lögreglumenn eltu manninn inn í nálæga lestarstöð og skipuðu honum ítrekað að nema staðar. Í stað þess að stoppa hljóp hann undan lögreglunni, sem elti hann og skaut til bana á stuttu færi. Talsmaður Samtaka múslima í Bretlandi, Azzam Tamimi, sagði í samtali við BBC að fólk myndi nú óttast að ganga um stræti borgarinnar og að ferðast með neðanjarðarlestum. "Ég óttaðist að til þessa kæmi," sagði hann. "Það er skelfilegt að gefa fólki leyfi til að skjóta einhvern til bana einungis vegna grunsemda, líkt og þarna gerðist," sagði Tamimi. Tveir menn hafa verið handteknir og sæta yfirheyrslu í tengslum við sprengjuárásirnar. Annar maðurinn var handtekinn seinnipartinn á föstudag og hinn aðfaranótt laugardags. Þeir eru báðir í haldi á grundvelli hryðjuverkalaga sem gefa lögreglu leyfi til að halda þeim í tvær vikur án þess að kæra þurfi að koma til. Lögreglan hefur lýst eftir fjórum mönnum sem grunaðir eru um að tengjast árásunum og taka þúsundir lögreglumanna þátt í eftirgrennslan vegna þeirra. Lögreglan sagði viðbrögð við eftirlýsingunni góð og á föstudag hefðu fjögur hundruð símtöl borist.