Frostnætur tíðar í maí

Það sem af er þessum maímánuði hafa frostnætur verið alltíðar. Lætur nærri að í innsveitum hafi mælst frost aðra hverja nótt í mánuðinum samkvæmt upplýsingum frá Veðurstofunni. Þannig hafa frostnætur verið tólf á Hjarðarlandi í Biskupstungum og þrettán á Staðarhóli í Aðaldal. Í Reykjavík hefur næturfrost einnig verið oftar en venja er til eða átta sinnum líkt og á Akureyri. Mánuðurinn hefur hingað til verið heldur kaldari en í meðalári en á Norðurlandi hefur meðalhitinn verið svipaður á saman tíma (til og með 21. maí) undanfarin þrjú ár. Veðurstofan segir að það sem af sé mánuðinum hafi einnig verið þurrt og úrkoman mælst um eða innan við 10 mm í flestum landshlutum að undanskildu Norðausturlandi. Gróðurframvindan hefur þetta vorið verið heldur hæg af þessum sökum en Veðurstofan bendir á að einkennisveðurlag maímánaðar sé hár loftþrýstingur með björtu veðri og lítilli úrkomu þar sem norðanátt er gjarnan ríkjandi. Veðurstofan gerir ekki ráð fyrir teljandi breytingum í spá sinni fyrir komandi viku.