Kewell í hópnum hjá Liverpool

Ástralski miðjuleikmaðurinn Harry Kewell hjá Liverpool hefur gefið kost á sér í leikmannahóp Liverpool, sem mætir Chelsea annað kvöld í undanúrslitum Meistaradeildarinnar. Rafael Benitez segist vera mjög ánægður með ákvörðun Ástralans, en leikmannahópur þeirra rauðu hefur verið ansi þunnur í vetur vegna meiðsla. "Ég er ekki viss um að Harry geti byrjað inná hjá okkur, en hann gæti eflaust gefið okkur 20-40 mínútur í leiknum og það er okkur dýrmætt að hafa um það að velja núna," sagði Benitez. Kewell hefur átt í ótrúlegum meiðslum í vetur og er varla þann líkamshluta að finna á honum sem ekki hefur orðið fyrir hnjaski. "Ég mun hætta á að hljóta frekari alvarleg meiðsli, því ég vil hjálpa liðinu í þessum mikilvægu leikjum sem eftir eru," sagði Kewell.