Créteil vill fá Bjarna

Landsliðsmaðurinn og ÍR-ingurinn Bjarni Fritzson kom heim frá Frakklandi í gær þar sem hann var í skoðun hjá franska félaginu Créteil. Forráðamönnum franska félagsins leist vel á Bjarna og þeir munu freista þess að ná samningum við hann á næstu dögum. "Mér leist verulega vel á þetta félag og það á margt sameiginlegt með ÍR. Það er góð fjölskyldustemning þarna," sagði Bjarni við Fréttablaðið nýlentur frá París í gær en hann hyggst reyna að ná samningum við félagið helst ekki síðar en um helgina. "Það væri gott að klára þetta fyrir úrslitakeppnina og ég er nokkuð bjartsýnn á að það takist." Félagi Bjarna hjá ÍR, Ingimundur Ingimundarson, gæti einnig farið til franska félagsins en það hefur spurst fyrir um Ingimund.