Kláruðu verkefnið með stæl

Ísland lék um helgina við Úkraínu, Holland og Austurríki um laust sæti á Heimsmeistaramóti U-21 árs liða sem fram fer í Ungverjalandi í sumar. Fyrirfram var búist við að íslenska liðið væri sterkasta liðið í riðlinum og að það ætti að tryggja sér sigurinn næsta auðveldlega. Með þessa pressu á bakinu, stóðu strákarnir sig með prýði og kláruðu verkefnið nokkuð örugglega en þeir höfðu öruggan sigur á öllum mótherjum sínum um helgina. Það tók strákana að vísu nokkurn tíma að slípa saman leik sinn, enda höfðu þeir takmarkaðan tíma til æfinga. Það kom þó ekki að sök og liðið sigraði nokkuð örugglega í öllum leikjunum. Hollendinga unnu þeir 33-27, Úkraínu 35-30 og í lokaleiknum burstuðu þeir Austurríki 36-24 og því var sigurinn í riðlinum öruggur. Íslenska liðið var að leika mjög vel í heildina og átti fjóra af sjö mönnum í úrvalsliði mótsins, þá Kára Kristjánsson línumann, Arnór Atlason skyttu, Árna Björn Þórarinsson hornamann og Björgvin Gústavsson markvörð, sem einnig var kosinn maður mótsins en hann fór hamförum í síðasta leiknum og varði 31 skot. Ásgeir Örn Hallgrímsson var ánægður með útkomuna á mótinu um helgina. "Við hefðum kannski átt að vinna leikinn við Holland með meiri mun, en við náðum að klára þetta verkefni nokkuð örugglega og það er það sem skiptir máli. Hópurinn er mjög sterkur hjá okkur og við hefðum að vísu geta farið betur með dauðafærin okkar og vítin, en það er eitthvað sem við getum auðveldlega bætt. Mér fannst hinsvegar sóknarleikurinn mjög góður og markvarslan var frábær, þrátt fyrir að við þurfum að bæta varnarleikinn meira," sagði Ásgeir Örn.