Vignir í viðræðum við Skjern

Vignir Svavarsson, línumaðurinn sterki hjá Haukum og íslenska landsliðinu, er staddur í Danmörku þessa dagana þar sem hann ræðir við danska liðið Skjern. Gamli Haukamaðurinn Aron Kristjánsson er aðstoðarþjálfari liðsins en einnig leika miðjumaðurinn Ragnar Óskarsson og Jón Jóhannsson með liðinu. Vignir sagði í samtali við Fréttablaðið í gær að hann hefði fengið samning í hendurnar frá félaginu en að hann hefði ekki tekið ákvörðun um hvort hann myndi taka þeim samningi. "Það eru nokkrir möguleikar í stöðunni hjá mér og ég mun fara yfir þá. Mér líst mjög vel á allar aðstæður hér hjá Skjern og liðið er spennandi kostur," sagði Vignir sem sagðist búast við því að ákveða sig í vikunni.