Skemmtilegasti leikur vetrarins

Haukar og Grindavík munu etja kappi í Laugardalshöll í dag en þá ráðast úrslitin í bikarkeppni KKÍ & Lýsingar í körfuknattleik. Haukastúlkur eru orðnar langeygar eftir bikartitli en þær báru sigur úr býtum árið 1984. Grindvíkingar hafa hins vegar aldrei unnið titilinn en liðið komst í úrslit árið 1994 en mátti lúta í lægra haldi fyrir nágrönnum sínum í Keflavík. Haukaliðið hefur komið mörgum að óvörum í vetur og náð góðum árangri, bæði í deild og Hópbílabikar þar sem liðið komst í undanúrslit. Þrátt fyrir ungan aldur hefur liðið sýnt vígtennurnar svo um munar og sló t.a.m. út hið reynslumikla lið Keflvíkinga, 100-72, í undanúrslitum bikarkeppninnar. Það var í fyrsta sinn í sögunni sem liði tekst að skora 100 stig á Keflavík og afrek Haukastelpna því algjört einsdæmi. "Já, það er ekkert Keflavíkurlið í úrslitum núna en þannig er nú bara körfuboltinn," sagði Ebony Shaw leikmaður Hauka. "Fáir áttu von á að við gætum komist svona langt, flestar stelpurnar mjög ungar og reynslan ekki mikil í liðinu. Það er því ekki mikil pressa á okkur fyrir úrslitaleikinn sem þýðir að við getum mætt afslappaðar til leiks og notið þess að spila körfubolta." Haukastúlkur hafa æft stíft upp á síðkastið en Ebony vildi lítið gefa upp hvað færi fram á æfingum. "Þær eru með öfluga skorara sem við þurfum að halda í skefjum og svo munum við reyna að leika hraðan bolta eins og við erum vanar." Sólveig Gunnlaugsdóttir, fyrirliði Grindavíkurliðsins, gerði sér grein fyrir alvöru málsins. "Liðið sem vinnur fer heim með titil þannig að þetta er stórleikur sem gæti orðið einn skemmtilegasti leikur vetrarins," sagði Sólveig og bætti því við Grindavíkurstúlkur myndu hafa litlar áhyggjur af leikskipulagi Haukanna. "Ef við erum vel stemmdar þá getum við ráðið úrslitunum sjálfar, það ræðst mikið af því. Við höfum að vísu verið að detta niður á slæma daga inn á milli en virðumst vera komnar á gott skrið. Við verðum tilbúnar á sunnudaginn og okkur langar að sýna hvað í okkur býr."