Zidane tryggði Real sigur

Zinedine Zidane tryggði Real Madrid sigur í sex mínútna leiknum fræga með marki úr vítaspyrnu á síðustu mínútunni. Eins og frægt er var leik hætt á 84. mínútu þann 12. desember síðastliðinn eftir að sprengjuhótun var tilkynnt á Santiago Bernabeu. Liðin komust að samkomulagi um að klára leikinn í kvöld sem endaði með sigri Real. Þetta var fyrsti leikur Real Madrid undir stjórn nýja stjórans Wanderley Luxemburgo. Eins og fyrr segir var það Zidane sem skoraði sigurmarkið úr vítaspyrnu, en hann skoraði framhjá Asier Riesgo eftir að Mikel Labaka hafði brotið á Ronaldo innan teigs.