Fáir út fyrir hússins dyr

Það lægði aðeins í gærkvöldi en svo kom aftur smá hvellur í morgun og það er rétt hægt að komast um göturnar, en ekki mikið meira en það," segir Guðmundur Ingþór Guðjónsson lögregluþjónn á Patreksfirði um veðurfarið. "Við höfum þó ekki þurft að aðstoða fólk við að komast á milli staða, það hefur allt sloppið," bætir hann við. Rýma hefur þurft íbúðarhús á Patreksfirði og Tálknafirði og lítil snjóflóð hafa fallið á bæði Patreksfirði og Bíldudal. Búist er við lítilli snjókomu næstu daga en norðanátt og því hætt við að snjóflóðahætta verði áfram. Pósthúsið á Patreksfirði var lokað á mánudag vegna ófærðar en opnað aftur í gær. Þá var matvöruverslun bæjarins, Kjöt og Fiskur, lokuð eftir hádegi á mánudag en opin í gær. Á norðanverðum Vestfjörðum hefur borið á vöruskorti en Einar Ásgeir Ásgeirsson, eigandi Kjöts og fisks, segir ekki illa komið fyrir sér. "Ég er í góðum málum og á von á sendingu með flutningabíl í kvöld." Hann segir þó að lítið sé að gera á meðan veðrið er svona slæmt og fáir á ferli.