Leiðindaveðri spáð í kvöld

Útlit er fyrir leiðindaveður sunnan- og vestanlands seinni partinn í dag. Þar er búist við stormi með snjókomu og éljagangi. Á Norðaustur- og Austurlandi gæti hins vegar orðið sæmilegt veður með hægari vindi og einhverjum éljum. Hitastigið verður líklega um frostmark og fer kólnandi með kvöldinu. Höfuðborgarbúar geta þó enn haldið í vonina um að það viðri sæmilega á flugeldana um miðnæturbil, en mögulegt er að það birti aðeins til og vind lægi þegar líða fer á kvöldið.