Ming og O´Neal með flest atkvæði

Miðherjarnir Yao Ming hjá Houston Rockets og Shaquille O´Neal hjá Miami Heat hafa fengið flest atkvæði í kosningu byrjunarliða í Stjörnuleiknum í NBA-deildinni 2005 sem fer fram í Denver 20. febrúar. Fólkið kýs byrjunarliðin á vefsvæðinu nba.com og greinilegt að Kínverjar eru duglegir að kjósa því þeirra maður Yao Ming hefur fengið flest atkvæði allra leikmanna í deildinni. Hann hefur fengið 881.223 atkvæði og getur ekkert annað en meiðsli hans sjálfs komið í veg fyrir að hann verði í byrjunarliði vesturdeildarinnar í Stjörnuleiknum. Hann hefur fengið rúmlega 750 þúsund fleiri atkvæði en næsti miðherji, Brad Miller hjá Sacramento Kings. Kevin Garnett hjá Minnesota Timberwolves og Tim Duncan hafa fengið flest atkvæði framherja í vesturdeildinni en sá sem veitir þeim harðasta keppni er Þjóðverjinn Dirk Nowitzki hjá Dallas Mavericks. Tracy McGrady hjá Houston Rockets og Kobe Bryant hjá Los Angeles Lakers eru síðan efstir á meðal bakvarða og þarf leikstjórnandinn Steve Nash hjá Phoenix Suns á kraftaverki að halda til að geta skákað þeim. Shaquille O´Neal hefur fengið flest atkvæði allra í austurdeildinni og líkt og hjá Ming er hann öruggur með sæti í byrjunarliðinu. Ben Wallace, miðherji Detroit Pistons, kemur honum næstur en hann er tæplega 600 þúsund atkvæðum á eftir O´Neal. Vince Carter, sem er nýgenginn til liðs við New Jersey Nets, og Grant Hill hjá Orlando Magic eru efstir meðal framherja austurdeildarinnar en Hill mun koma til með að fá harða samkeppni frá Jermaine O´Neal, framherja Indiana Pacers. Hinn ungi LeBron James hjá Cleveland Cavaliers og Allen Iverson hjá Philadelphia 76ers eru efstir meðal bakvarða í austurdeildinni en Dwayne Wade hjá Miami Heat og Steve Francis hjá Orlando Magic koma þar ekki langt á eftir.