Bakvinnslusvið KB banka hefur starfsemi á Akureyri

KB banki hefur tekið í notkun nýja deild á Akureyri og er hún hluti af bakvinnslusviði bankans. Nú þegar hafa átta nýir starfsmenn tekið til starfa við deildina og munu þeir annast ýmis bakvinnslustörf fyrir höfuðstöðvar bankans og útibú hans. Gert er ráð fyrir að þeim fjölgi í allt að 15 manns á árinu 2005. Það kom í hlut Kristjáns Þórs Júlíussonar, bæjarstjóra á Akureyri, að klippa á borða og opna bakvinnsludeildina formlega og lýsti hann yfir mikilli ánægju með þá ákvörðun að opna þessa nýju deild á Akureyri. Valgerður Sverrisdóttir iðnaðar- og viðskiptaráðherra ávarpaði samkomuna og sagðist taka ofan fyrir KB banka vegna þessa atburðar. Liður í að efla Akureyri og Eyjafjarðarsvæðið KB banki er stærsti banki landsins og hefur umfang starfseminnar aukist jafnt og þétt á síðustu misserum. Bankinn rekur nú 36 útibú og afgreiðslustöðvar hér á landi en er auk þess með öfluga og sívaxandi starfsemi erlendis. Við vígsluathöfnina sagði Hreiðar Már Sigurðsson, forstjóri KB banka, að það væri KB banka mikið ánægjuefni að gangsetja þessa vinnslu á Akureyri. "KB banki er öflugur þátttakandi í sókn fyrirtækja á erlendan markað, en bankinn er ekki síður áhugasamur um verkefni sín innanlands. Við erum stærsti banki landsins en eigum samt talsvert í land með að ná mestu markaðshlutdeild í viðskiptum við einstaklinga. Þess vegna erum við í öflugri "útrás" hér á íslensku vígstöðvunum ekki síður en á alþjóðavettvangi og hluti af henni er að gera "innrás" út á landsbyggðina."