Ekki tímabært að ræða verkfall

Björg Bjarnadóttir, formaður Félags leikskólakennara, segir ekki tímabært að ræða það hvort leikskólakennarar nýti sér verkfallsrétt til að ná fram kröfu um sömu laun og aðrir kennarar. Hún er hæfilega vongóð um að sveitarfélögin gangi að kröfum þeirra. Samninganefnd leikskólakennar og launanefnd sveitarfélaganna hittust í dag eftir tveggja vikna hlé þar sem farið var yfir stöðu mála. Kröfur leikskólakennara hafa þó legið fyrir frá því samningar þeirra runnu út í lok ágústmánaðar. Björg Bjarnadóttir, formaður Félags leikskólakennara, segir þær vera í fyrsta lagi að jafna laun leikskólakennara við laun kennara með sambærilega menntun. Í öðru lagi að skoðað sé ýmislegt er varði tíma til undirbúnings, mats og úrvinnnslu á starfinu því það hafi þróast ört með síauknum kröfum. Aðspurð hvort hún segist bjartsýn að leikskólakennarar hafi erindi sem erfiði segist Björg vera í eðli sínu bjartsýn en vissulega sé ekki mikið í hinu ytri umhverfi núna sem gefi tilefni til bjartsýni. „En við skulum sjá,“ segir Björg.   Viðræðuáætlun er í gildi sem rennur út eftir viku. Í henni er ákvæði um að málinu verði þá vísað til Ríkissáttasemjara nema deilendur komi sér saman um annað. Formaður félags leikskólakennara vill þó engu spá um það hvort það stefni í verkfall leikskólakennara. Við leikskóla landsins starfa 1500 kennarar og nemendurnir eru um 17.000. Björg segist ekki vilja tala um verkfall fyrr en nauðsyn krefji.